Hinawan ni Jose F. Lacaba ang landas sa paggamit ng pinakasimpleng mga salita sa makabagong panulaang Filipino. Madaling kagiliwan, magaan basahin ang kanyang mga tula, ngunit may kinang, talim, at lalim. Ang 60 tula sa kalipunang ito, pinili ng may-akda mismo, ay mula sa tatlong aklat na produkto ng mahigit sa apat na dekada ng pambeberso. Kasama rito ang mga tulang madalas ilathala sa mga antolohiya at teksbuk, tulad ng Paksiw na Ayungin, Pasyong Mahal ni San Jose, at Ang mga Kagila-gilalas na Pakikipagsapalaran ni Juan de la Cruz. Narito rin ang Prometheus Unbound, ang huling tulang Ingles na sinulat ni Lacaba, na unang nalathala sa ilalim ng sagisag at naging notoryus noong panahon ng batas militar.